آسٽريليا جي اسپينر ايڊم زمپا تي بال ٽيمپرنگ جا الزام، تصويرون سوشل ميڊيا ذريعي وائرل

لنڊن :-  آسٽريليا جي اسپينر ايڊم زمپا جون ڪجهه شڪي تصويرون ۽ وڊيو سوشل ميڊيا تي تيزي سان وائرل ٿي رهيون آهن جنهن کان پوءِ ان تي بال ٽيمپرنگ جا الزام هنيا پيا وڃن.آسٽريليا ۽ ڀارت جون ٽيمون گذريل ڏينهن لنڊن جي اوول گرائونڊ ۾ آمهون سامهون ٿيون هيون ۽ ڀارتي آسٽريليا کي 36 رنسن تان شڪست ڏني هئي. ڀارت خلاف کيڏيل ان ميچ ۾ آسٽريلوي اسپنر ايڊم زمپا پنهنجي کيسي مان ڪجهه ڪڍي بال تي مليندي نظر آيو جنهن سينڊ پيپر گيٽ اسڪينڊل جي ياد تازي ڪري ڇڏي.2018ع ۾ ڏکڻ آفريڪا خلاف ڪيپ ٽائون ٽيسٽ ۾ ڪيمرون بين ڪرافٽ کي کيسي مان ڪجهه ڪڍي بال تي مليندي ڏٺو ويو هو جنهن کان پوءِ بال ٽيمپرنگ جو تڪرار شروع ٿيو هو. اُن وقت آسٽريلوي ڪپتان اسٽيو اسمٿ بال ٽيمپرنگ جو الزام قبول ڪيو هو جنهن کان پوءِ آسٽريلوي ڪرڪيٽ بورڊ اسمٿ ۽ سندس نائب ڊيوڊ وارنر تي هڪ، هڪ سال جي پابندي لاڳو ڪئي هئي جڏهن ته بين ڪرافٽ تي 9 مهينن جي پابندي مڙهي وئي هئي.آسٽريليا جي ورلڊ ڪپ جي شروعاتي ٻن ميچن ۾ چار وڪيٽون حاصل ڪندڙ ايڊم زمپا ڀارت خلاف ميچ ۾ شروع کان ئي بي اثر رهيو ۽ ميچ ۾ هن 6 اوورن ۾ 50 رنسون ڏنيون ۽ وڪيٽ نه وٺي سگهيو. هاڻ ڏسون ٿا ايڊم زمپا جي ان حرڪت خلاف ڪو به ايڪشن کنيو ٿو وڃي يا نه ڇاڪاڻ ته جيڪڏهن ائين ٿئي ٿو ته پوءِ ورلڊ ڪپ دوران آسٽريلوي اسپنر وڏي مشڪل ۾ ڦاسي سگهي ٿو.جڏهن ته انٽرنيشنل ڪرڪيٽ ڪائونسل يا ٻنهي ٽيمن جي ڪرڪيٽ بورڊن جي طرفانا ڃان تائين باضابطه طور تي ڪابه شڪايت سامهون ناهي آئي ۽ نه ئي ان معاملي جو نوٽيس ورتو ويو آهي.